കള്ളിപ്പൂച്ചക്ക് …

എന്‍റെ സ്വപ്നങ്ങളെ കട്ടുകുടിച്ച  കള്ളിപ്പൂച്ചക്ക് …

നിന്‍റെ നീളന്‍  മീശകളില്‍ ഉറുമ്പരിക്കുമ്പോള്‍ ,

ഉറുമ്പുകളുടെ  മാളത്തിലും എത്തും
എന്‍റെ സ്വപ്നങ്ങളുടെ -

പൊട്ടും  പൊടിയും .

ഉറുമ്പുകളുടെ  രാജാവിന്‍റെ നിലവറയില്‍,

കൂറ്റന്‍  താഴിന്നും മതില്‍ക്കെട്ടിനും അപ്പുറത്ത്‌-

ഒരു  മുറി  നിറയെ 
എന്‍റെ  സ്വപ്നപ്പൂമ്പാറ്റകള്‍.

എന്റെ പ്രിയ കവിക്കായി

നിസ്സിം ഇസേകില്‍: പറുദീസയുടെ കാവല്‍ക്കാരാ!

(അ)വിശ്വാസത്തിന്റെ ഇലച്ചാറില്‍

ജന്മാജന്മങ്ങളുടെ കണക്കെഴുതിയ

കാല്പനികന്‍ നീ...

വാക്കുകളെ  പ്രണയപൂര്‍വ്വം

വേട്ടയാടി,

വരകളെ വാക്കിലലിയിച്ച

മായാജാലം.

അപൂര്‍വങ്ങളില്‍ അപൂര്‍വത്തെത്തേടി-

ഇഴഞ്ഞു നീങ്ങുന്ന

കവിയും കാമുകനും നീ തന്നെ.

ക്ഷമയെ, കാത്തിരിപ്പിന്റെ കടും നിറങ്ങളെ

കാര്‍ക്കശ്യത്തിന്റെ ഊതനിറത്തില്‍

ചാലിച്ചപ്പോഴും;

ശാബത്തിന്റെ പാനപാത്രങ്ങളില്‍

നിറഞ്ഞുകവിഞ്ഞ വീഞ്ഞായി

നിന്റെ പ്രണയം.

കത്തുന്ന നഗരവീഥിയില്‍

അടഞ്ഞുകിടന്ന വാതിലിനുമപ്പുറം,

ഭാഷയറിയാത്ത മന്ത്രങ്ങളില്‍

പകച്ചു വിളറിയ 'ആ മുഖം

എനിക്കിന്നും കാണാം.

ഒരു 'ഴ' യും കുറെ സ്വത്വവാദചിന്തകളും

വഴിയിലെ നിഴലിലും

പുഴയിലെ മഴയിലും

ഒഴിയാതെ-മായാതെ;

കഴുകന്‍കഴുത്തിലും

ഒഴുക്കിന്നാഴത്തിലും

വഴുക്കാതെ-വീഴാതെ,

മലയാഴ്മയില്‍

വഴിഞ്ഞൊഴുകുന്ന 'ഴ'യുടെ,

വരുത്തന്റെ കേഴ്വിയെ-

ക്കുഴക്കിടും ശബ്ദമായ്

വാഴുന്ന " 'ഴ'യുടെ-

യുടമകള്‍ നാമെന്നു"

മൊഴിയുവാന്‍ നില്‍ക്കവേ,

ഓര്‍ത്തിടൂ സോദരീ-

മുഴുവനുമറിയാതെ

മിഴികളടച്ചു നീ,

മൊഴിയുന്ന വാക്കിന്റെ

പോരുളിനെയോര്‍ക്കുക!!

പഴയ നിന്‍ പാഠത്തില്‍

പഴകിയോരോര്‍മയില്‍

കഴിയുന്ന ഴാങ് വാല്‍  ഴാങ്,

ഴാങ്  ദാര്‍ക്കുമാരെയും!!